New trend in France… Buy tickets, be a guest at a wedding | फ्रान्समध्ये नवा ट्रेंड… तिकिटे खरेदी करा, लग्नात पाहुणे व्हा: अनोळखी लोकांशी संपर्क साधण्याचा अनुभव घ्या… आनंदासोबतच खर्चही वाटून घ्या

जेनिफर आणि पाउलो या महिन्याच्या अखेरीस पॅरिसजवळील ग्रामीण भागात लग्नबंधनात अडकतील. एका भव्य रिसॉर्ट आणि शाही सजावटीमध्ये त्यांच्या लग्नात ८० प्रौढ आणि १५ मुले असतील. ते इंग्लंड, जर्मनी आणि पोर्तुगालमधून येतील. विशेष म्हणजे लग्नात एक डझन अनोळखी पाहुणेदेखील असतील, ज्यांनी कार्यक्रमाला उपस्थित राहण्यासाठी तिकिटे खरेदी केली आहेत. या अनोळखी पाहुण्यांना आमंत्रित करण्याची कल्पना जेनिफरची आहे. जेनिफर व्यवसायाने अभिनेत्री, पाउलोसोबत एका मेळाव्यात गेली होती आणि एका स्टॉलने तिला चकित केले. ते पॅरिसमधील एक स्टार्टअप होते. त्यांची योजना होती की वधू आणि वर लग्नाची तिकिटे काही अनोळखी लोकांना विकू शकतात. यामुळे त्यांना लग्नाच्या खर्चात मदत होईल आणि तिकीट खरेदीदारांनाही लग्न सोहळ्याचा आनंद घेता येईल.

हे पाहुणे लग्नातील सर्व विधी व कार्यक्रमात सहभागी होती. जेनिफर म्हणते, ‘हे फक्त पैशांबद्दल नाही, हा अनुभव मजेदार असेल.’ कॅटियाच्या मते, २५ ते ३५ वयोगटातील जोडपी यात रस दाखवतात. अशा सोहळ्यात उपस्थित राहण्यासाठी पाहुण्यांना १०-१५ हजार रुपये द्यावे लागतात. योग्य कपडे घालणे, वेळेवर पोहोचणे आणि परवानगीशिवाय फोटो शेअर न करणे असे नियम पाळावे लागतात. वधू-वरांवर पाहुण्यांशी बोलण्याचा कोणताही दबाव नाही. पाहुणे स्वतःहून त्यांच्याशी मिसळतात. असेच एक अनोळखी जोडपे, लॉरेन आणि तिचा नवरा, जेनिफरच्या लग्नाला उपस्थित राहण्यासाठी येतील. ते कुटुंबातील पाहुणे म्हणून जाण्याची तयारी करत आहेत. लॉरेनचा असा विश्वास आहे की लग्न हा आनंद वाटण्याचा सर्वोत्तम मार्ग आहे. ‘आनंदी आणि प्रेमळ वातावरणाचा असा अनुभव, जो तुम्हाला वारंवार घेता येईल. तिकिटाची किंमत जास्त वाटू शकते, परंतु ही एक उत्तम संधी आहे, जी गमावू नये.’

स्टार्टअपची संकल्पना, पाहुण्यांकडून कमिशन घेऊन ते करतात काम

अशा अनोळखी पाहुण्यांना जोडणाऱ्या ‘इन्व्हिटिन’च्या संस्थापक कॅटिया लेकार्स्की म्हणतात, ‘पॅरिसमध्ये असे सहा लग्न होणार आहेत. पूर्वी मी कार्यक्रमांसाठी माझे घर भाड्याने देत असे. माझी ५ वर्षांची मुलगी अनेकदा विचारायची, ‘तुम्ही आम्हाला लग्नांना का आमंत्रित करत नाही?’ मी विचार केला, जर आपण तिकिटे खरेदी करून लग्नाला जाऊ शकतो आणि जोडप्याला मदत करू शकतो तर यापेक्षा चांगले काय होईल. यानंतर इन्व्हिटिन सुरू झाले. भारतात ‘जॉइन माय वेडिंग’ परदेशी पर्यटकांना लग्नांशी जोडते. फ्रान्समध्ये, स्थानिकांसाठी हा एक नवीन अनुभव आहे, ज्याचे इन्व्हिटिन कमिशन घेते. लेकार्स्की म्हणतात, हा प्रकल्प अजूनही सुरुवातीच्या टप्प्यात आहे व सर्वात मोठे आव्हान म्हणजे जोडपे आणि पाहुणे शोधणे.